مہنداول، سنت کبیر نگر (نامہ نگار)
دارالعلوم اہلسنت فیض الاسلام قصبہ مہنداول کے کلرک غلام رسول قریشی کے ریٹائرمنٹ پر دارالعلوم ہذا کے وسیع ہال میں ایک الوداعی تقریب کا انعقاد ہوا۔ اس موقع پر دارالعلوم ہذا کے استاذ ظہیر الدین انصاری نے کہا کہ کلرک غلام رسول قریشی نے جس توانائی ، جس ایمانداری اور جس لگن کے ساتھ کام کرتے رہے وہ قابل ستائش رہا ہم امید کرتے ہیں وہ ریٹائرمنٹ کے بعد بھی اسی طرح مدرسے کا ساتھ دیتے رہیں گے۔ آپ کے 33 سالوں کا بہترین تجربہ ہمارے کام آسکتا ہے۔
انہوں نے کہا کہ مدرسہ کے بہت سے مدرسین کی کچھ دقتیں اور پریشانیاں ایسی ہوتی ہیں جن کا تصفیہ نہ ضلعی سطح پر ہوتا ہے اور نہ صوبائی سطح پر۔ لیکن جب ہم لوگ آپس میں بیٹھ کر بات اور مشورہ کرتے ہیں تو ان پریشانیوں کا حل آسانی سے نکل آیا کرتا ہے۔ مسٹر انصاری نے کہا کہ میں بہت خوش قسمت ہوں جو آج مجھے غلام رسول قریشی کی وداعی تقریب میں شریک ہونے کا شرف حاصل ہو رہا ہے۔
تقریب میں شریک ماسٹر غلام رسول انصاری نے کہا کہ غلام رسول قریشی کا خدماتی دور بے داغ رہا ہے۔
اکثر دیکھنے اور سننے کو ملتا ہے کہ کلرک نے کسی مدرس کے ساتھ اچھا سلوک نہیں کیا ، ان کے ساتھ انصاف نہیں کیا ، ان کی حق تلفی کی ایسے ملازم کے ریٹائرمنٹ پر ان کے لئے کوئی تقریب نہیں ہوتی نہ ہی ان کو الوداعیہ دیا جاتا ہے۔ اور جو استاد یا کلرک لگن ، محنت اور بڑی ذمہ داری سے کام کرتے ہیں۔ ان کے ریٹائرمنٹ پر مدرسہ کی کمیٹی اور اساتذہ ان کی گلپوشی کرکے شاندار الوداعیہ دیتے ہیں۔ اسے یہ احساس دلاتے ہیں کہ آپ نے بہترین انداز میں ہمارے مدرسہ میں خدمات انجام دی ہیں آپ کے جانے سے ہمیں افسوس ہو رہا ہے۔ تقریب میں سبکدوش ہورہے کلرک غلام رسول قریشی کی گلپوشی کی گئی اور شال اوڑھا کر ان کا استقبال کیا گیا
اس تقریب میں مولانا وجیہ الدین قادری پرنسپل، مولانا محمد قاسم عزیزی، مفتی علاؤالدین مصباحی، مولانا محمد زماں قادری، مولانا ظفریاب جیلانی، مولانا عبد الرحیم مصباحی، قاری اخلاق احمد مصباحی، ماسٹر احمد حسین انصاری، قاری انوار الحق، اور ماسٹر الطاف حسین انصاری کی شرکت قابل ذکر ہے۔
